育兒日記（上）｜給飼養哥基新手的心理準備：家中會多了一部流動「碎紙基」!
最近家裡添了一位新成員，就係一隻哥基狗BB啦！同大家介紹番：
新手養狗BB，你的第一張清單如下：（不是新手可以skip）
- 籠一個（為防佢未熟悉環境，周圍大小便）
- 尿片、濕紙巾
- 毛巾（舖係籠度俾狗BB瞓覺用）
- 有聲可咬的玩具（俾狗BB出牙仔牙痕，又會換牙，會連續咬嘢6-7個月）
- 尖角位要搵軟膠保護、電線要收好
- 矮小屏風可以阻隔一些不想狗狗接觸的地帶，e.g 廚房
哥基，一字記之曰：「咬！」
而如果你正要準備迎接哥基BB 成為你家中一員？作為一個過來人，我想先給你一個心理準備，因為你將會引進了一樣最新的破壞武器，人稱「萬能碎紙基」⋯⋯
咬咬咬咬咬⋯⋯
我又咬咬咬咬咬⋯⋯咬完媽咪件衫再咬媽咪～yeah
好多人養哥基後，屋企嘅牆紙、地腳線、木地板等等⋯⋯無一倖免，俾佢地咬到爛鬼哂，總之有凹凸表面嘅都一定一定成為柯基嘅咬嘢目標！不過唔駛心灰，呢個情況絕對可以改善！頭幾個月一定要悉心照顧和教導，唔乖的狗最後會養得好辛苦，所以我決意要養scottie養到好聽話。
教導狗BB的3個心得
第1：認人
首先要教狗BB，邊個打邊個，然後屋企有幾多個人（包括工人也好），都要有同一個training method，如果比狗BB 發現有一個人對佢的態度唔同，可能就唔會聽果個人嘅說話了！
點樣教佢認人呀？好簡單，狗仔認人都係靠聽覺，然後教狗狗分 Daddy/Mommy (or其他人啦)，如果佢行去啱咗嘅人度就會獎勵狗狗，自然就會知叫咩名佢就去邊度㗎啦～大約1日都已經可以成功認人。
第2：認聲
主人的聲線和動作是教導的關鍵：
- 聲線要分幾個Tone 等佢識分日常、讚賞、懲罰mode。
- 讚賞狗狗時可加入動作，例如摸面、溫柔的撫摸。
- 懲罰狗狗動作要比讚賞時不同。
- 若然狗狗咬你的話，你不可以縮手或退後，不然狗狗就會以為你同佢玩緊
- 當狗狗做完一個動作，主人可以重覆說出動作的名稱，例如當狗狗去廁所，主人可重覆Wee Wee ～Wee Wee，然後，痾啱位置便立刻讚賞，狗狗便知道自己做緊乜同埋係咩位置可以做啲乜)
最後第3點：狗狗每天要有schedule 要有規律
每日記低 & 規劃狗狗的飲食作息、生理時間和控制玩樂時間。
- 生理時間：狗狗每朝起身或每餐飯後（約30分鐘）都會poo & wee，盡量狗狗食完飯都抱返佢入籠，令佢知道食完飯休息下就要poo & wee，之後先放佢出嚟玩。（呢個動作可以避免佢玩玩下瀨屎/尿）
- 玩樂時間：太約25分鐘（狗BB 最盡去到1個半鐘），玩太耐佢會開始唔聽指令同埋不斷咬人! 如果出現呢個情況立刻抱返佢入籠。
Q：如果遇到唔肯poo poo 的狗BB要點做呢？
A：所有狗狗的天性，去廁所前都會打圈轉，可以嘗試一下引導佢做呢個動作，主人籠外行圈，狗狗會跟住你行圈，我老公試過呢招都將Work！Scottie 會好快就poo poo，唔會掛住玩。
大約維持規律Schedule 兩星期後，Scottie 都已經學識食飽就自行行入籠度poo poo 了。如果你的狗狗都會識得行入籠poo ，個人建議唔一定要閂個籠，因為呢個舉動有可能令狗狗以為你罰佢的。
溫柔地解決哥基喜歡咬咬咬的問題
榮獲柯基咬嘢排行榜第一位：腳趾。呢個問題點解決呢？成日鬧佢都唔係辦法，因為係佢地水平角度，腳趾圓碌碌又成日行來行去，係佢地眼中係一件好吸引好好玩嘅玩具，著返對毛毛拖鞋啦，女人養生腳一定要暖，win win !
如果狗狗咬主人手腳，又點教呢？記住以下3個方法！
- 立刻鬧佢，按狗狗的pat pat 要佢坐底！冷靜一下
- 扮慘，慘叫，個樣好鬼痛咁望住佢，令佢好guilty
- 如果咬你手，你就直頭收埋對手，令佢掂唔到，無得咬就會自然停㗎啦（記得唔好左右fing，會以為你同佢玩）
小總結：前後養過兩隻哥基，兩隻唔同性格，Scottie 比較Grumpy同埋好好好好好好鍾意咬嘢（所以呢段時間真係要mon 實同埋教好佢），以前另一隻哥基popeye 相比下咬嘢情況少好多仲好中意錫我！（笑）
呢隻就係Popeye，好興奮，以為我係貓係咁錫我，哈！
育兒日記下集：集中講多啲有關寵物清潔、處理家居氣味、到狗糧選擇等等，敬請期待！
